İran: Danışıqlar razılaşma ilə bitməyib
İslamazeri.com xəbər verir ki, İran Xarici İşlər Nazirliyinin sözçüsü İslamabad danışıqlarının nəticə vermədiyini, lakin diplomatiyanın davam etdiyini bildirdi.
İran Xarici İşlər Nazirliyinin sözçüsü İsmayıl Bəqayi son danışıqların nəticəsi ilə bağlı bunları dedi:
“Bəzi məsələlərdə razılığa gəldik, lakin 2-3 vacib məqamda fikir ayrılıqları oldu və nəticədə danışıqlar razılığa gəlmədi.”
Bəqayi həmçinin qeyd etdi ki, bu danışıqlar raundu son bir ildə ən uzun müddət - ümumilikdə 24 və ya 25 saat davam edib.
“Diplomatiyanın heç vaxt bitmədiyini” vurğulayan Bəqayi deyib: “Bu vasitə milli maraqların qorunması üçündür və diplomatlar həm müharibədə, həm də sülhdə öz vəzifələrini yerinə yetirməlidirlər.”
O əlavə etdi ki, bu danışıqlar çətin 40 günlük müharibədən sonra və inamsızlıq və şübhə atmosferində baş tutub. Buna görə də o, bu danışıqların tək bir sessiyada başa çatmasını gözləməməyin təbii olduğunu bildirdi.
Tasnim xəbər agentliyinin məlumatına görə, Bəqayi məsələlərin mürəkkəbliyinə də toxunaraq bildirib: “Bu danışıqlara Hörmüz boğazı məsələsi kimi bəzi yeni məsələlər əlavə edilib; hər birinin özünəməxsus mürəkkəbliyi var”.
Bəqayi əlavə edib: “Bütün hallarda diplomatik aparat İran xalqının hüquq və mənafelərini qorumalıdır”.
O, həmçinin Pakistan hökumətinə və xalqına, eləcə də Pakistanın Baş naziri Şahbaz Şərif, Ordu rəisi Asim Munir və Pakistanın Baş nazirinin müavini İshaq Dar da daxil olmaqla rəsmilərə təşəkkür edib. “Biz onlara qonaqpərvərliklərinə görə təşəkkür edirik və inanırıq ki, İran, Pakistan və regiondakı digər dostlarımız arasında əlaqələr davam edəcək.
Diplomatiya vətənin müdafiəçilərinin yanındadır və biz hər cür fədakarlığa hazırıq”.
