Azərbaycanda ictimai mənəviyyata zidd məzmunun yayımı ilə bağlı yeni qadağalar qüvvəyə minib
İslamazeri.com xəbər verir ki, Azərbaycan Respublikasında informasiya sahəsini tənzimləyən qanunvericiliyə yeni maddə əlavə olunub. Prezident İlham Əliyev “İnformasiya, informasiyalaşdırma və informasiyanın mühafizəsi haqqında” Qanuna edilən dəyişiklikləri imzalayıb.
Yeni dəyişikliklərə əsasən, kütləvi şəkildə yayımlanan və ictimai mənəviyyatı təhqir edən məzmunun paylaşılması qadağan edilir. Qadağa əsasən media qurumlarına, internet resurslarına və sosial şəbəkələrdə ictimaiyyətə açıq paylaşımlara şamil olunur.
Qanunda göstərilir ki, əgər məlumatlar və ya vizual materiallar kütləvi nümayiş etdirilirsə, bu zaman aşağıdakı hallar ictimai mənəviyyata zidd hesab olunur:
-
əxlaqsız, söyüş və nalayiq ifadələrin açıq şəkildə səsləndirilməsi;
-
cəmiyyətdə hörmətsizlik təəssüratı yaradan jest və hərəkətlərin nümayişi;
-
insan bədəninin hissələrinin əxlaq normalarına və milli-mənəvi dəyərlərə zidd formada göstərilməsi;
-
cinsi məzmunlu, açıq-saçıq və ictimai əxlaqı pozan görüntülərin yayılması.
Qeyd olunur ki, bu qadağalar şəxsi yazışmalara və qapalı paylaşımlara aid deyil. Qanun yalnız ictimaiyyət üçün açıq, geniş auditoriyaya yönəlmiş məzmunu əhatə edir.
Mütəxəssislərin fikrincə, dəyişikliklər cəmiyyətin milli-mənəvi dəyərlərinin qorunmasına, sosial şəbəkələrdə və mediada etik normaların gücləndirilməsinə xidmət edir. Bununla yanaşı, qanunda birbaşa cərimə mexanizmi göstərilməsə də, pozuntular inzibati və ya məhkəmə qaydasında qiymətləndirilə bilər.
Yeni hüquqi tənzimləmənin məqsədi ifadə azadlığını məhdudlaşdırmaq deyil, ictimai əxlaqı və cəmiyyətin ümumi dəyərlərini qorumaqdır.
